|
3#
樓主 |
發表於 1-12-2009 11:41:46
|
只看該作者
「聯招」選校心得,報考「聯招」學生必看!
寫呢篇心得,係因為見到有唔少人選校錯誤,到左成績出o黎o既時候,要去讀一d國內3、4流既大學。為左幫助大家選校,所以就寫左呢篇心得俾大家參考。
首先,到內地讀大學,應該以暨南大學作為最低標准,係「聯招」入面唔好選擇比暨大更差既大學。咁係因為暨大既特殊性,作為一間國內排名50以內既大學,又係國家重點大學同211工程大學,由國務員僑務辦直屬,佢既實力比國內大部份大學都好,但佢對香港學生既錄取要求卻係最低o既。香港學生只要有中六學歷就可以報考「暨大華大兩校聯招」,分數300分以上就會被取錄,佢既實力同佢既錄取分數係唔成正比,所以我認為大家應該以暨大作為最低標准,唔好選擇比暨大更差o既學校。
其次,國內「高考」將大學分為一本、二本、三本。一本即係國內既重點分數線,全國重點大學、211工程、985工程大學全部都屬於第一批次既大學。香港各間大學係內地招生都要求「高考」分數係一本線以上。二本就係普通大學,三本就係專科。而「聯招」第一批次入面大部分都係國內一本,第二批次入面大部分既大學都屬於二本。
入正題喇。第一批大學o黎講,問題應該唔大,大部份第一批次既大學都比暨大好,所以呢度就唔多講,亦唔係重點。我最想講既係第二批次既大學,係第二批次既大學入面,質素好參差!大部份大學我都唔建議選擇,咁係因為佢地唔係全國重點大學,亦唔係211工程或985工程院校,好多連省重點都唔係。呢一類既大學係國內只屬於2本,係全國範圍內更加係屬於3、4流既大學。
點解全國重點大學、211工程大學咁重要呢?咁就要講下內地對普通大學既認可程度。係大學方面o黎睇,大部分國內大學招聘教授、講師或助教,都要求係全國重點大學本科畢業,北京師範大學珠海分校近期招聘,就要求全國重點大學本科及碩士畢業,一般大學畢業既連應徵資格都冇!係國家公務員o黎講,於211工程院校畢業既學生,係報考公務員既時候會獲得一定程度既優待,講明d即係加分!呢個不明文既「規定」,雖然國家冇正面承認或否認,但已經廣為人知,差唔多所有國內既大學生都知道呢個「規則」。
從呢兩點可以證明連國內大學自己同國家機關都歧視一般普通大學,咁佢地既係國內既地位大家可想而知!國內亦有一句說話叫「普碩不如重本」,即係話普通大學既碩士生都唔及重點大學既本科生,呢句話雖然有d誇張,但一定程度上可以反映內地普通大學既情況。既然內地普通大學既認受性係咁o既,我地仲有冇需要長途跋涉返去讀呢?所以「聯招」入面千萬唔好選擇國內既二本大學。
最後,我推薦幾間第二批次入面最值得讀既大學俾大家,佢地係國內既地位比好多第一批既大學都仲要高。亦有一d係屬於國內一本既大學。而我冇推薦既第二批次大學大家就要慎重考慮,要詳細了解佢地係唔係真係比暨大優勝。
(1)西南政法大學 (300分)。西南政法大學為全國重點大學,被稱為法學界既黃埔軍校,新中國最成功既大學。打下法學界半壁江山,係法學界有驕人既「西政現象」。西政既法學曾經同北大、人大法學院齊名,係法學界有「北佟南金」的稱號,北佟係指中國人民大學佟柔教授,南金就係西南政法大學既金平教授。而係中國校友網既中國中青年法學家排名中,西政獲獎人數超過北大、清華、中國政法大學、中國人民大學,成為全國第一。係《當代中國法學名家》收錄既176名法學名家中,有32名教授係o黎自西南政法大學,佔總人數5份之1。係《2007中國大學評價》中,西政法學被評為A+級,位列全國第八。經濟法學同訴訟法學被評為國家重點學科,經濟法學、民事訴訟法學、刑事訴訟法學、法理學被評為國家精品課程,法學被評為省重點一級學科。
(2)中醫藥類大學 (300分)。係第二批次入面既中醫藥類大學係一個好唔錯既選擇,比起係香港讀浸大中醫好。例如南京中醫藥大學就係WHO傳統醫學合作中心,國家衛生部確定既國際針灸培訓中心、全國中醫師資進修教育基地、臨床藥理基地。而且國內大部份中醫藥大學都獲香港中醫藥管理委員會認可,畢業後可以係香港報考「香港中醫執業資格試」。成為執業中醫師。
(3)中國醫科大學 (311分)。係《2007年中國大學評價中》被評為A級,全國排名11。中國醫科大學亦出產過9位衛生部正副部長、11位中科院、工程院院士。係國內屬於一本線上既大學。
(4)揚州大學 (350分)。江蘇省重點大學,獸醫學係佢地既優勢學科,農學被評為A級。基礎獸醫學被評為A級,位列全國第六。預防獸醫學被評為A++,位列全國第一。臨床獸醫學被評為A級,位列全國第七。
(5)江西財經大學(300分)。一個深圳既內地同學同埋一個山東既內地同學,不約而同地指江西財經大學先係中國最好既財經大學,而唔係上海財經大學。由於未經廣泛求証,先暫時列上,供大家參考。 |
|